Şəhərdə ikitəkərlilərin sayı getdikcə artır. Sürücülük vəsiqəsi tələb etməyən mopedlərin kreditlə satışı Bakıda moped sürücülərinin daha da artmasına gətirib çıxarır. Tıxaclardan yorulan avtomobil sürücüləri də yay aylarında motosikletlərə üstünlük verirlər. Hətta bəzən işıqforda o qədər ikitəkərli olur ki, şəhər Bombeyi xatırladır.
Bəs Bakıda motosikletləri hardan və neçəyə almaq olar?
Bakıda avtomobilləri alıb-satmaq üçün maşın bazarı olsa da, motosikletlərin satıldığı belə, xüsusi məkan yoxdur. Mopedlər və motosikletlər firma olaraq xüsusi servislərdə satışa çıxarılır. Əvvəllər Bakıda bir neçə brendin ( Yamaha, Ducati ) satış mərkəzləri mövcud olsa da, hazırda həmin servislər də bağlanıb.
Motosikletlərin qiyməti isə növünə, mühərrikinin həcminə, görünüşünə və xüsusiyyətlərinə görə dəyişir. Əksəriyyət motosikletin ucuz olduğunu düşünsə də, avtomobillərdən xeyli baha qiymətə satılan motosikletlər də var. Burada əsas məqam motosikletin istehsal olunduğu il, markası və başqa xüsusiyyətləridir. Hazırda Bakıda sürücülük vəsiqəsi tələb edən motosiklet almaq üçün minimum 2500 AZN pul lazımdır.
Bakıda 2020-ci ildə istehsal olunan motosikletləri satan bir neçə mağaza var ki, onlardan biri Nobel prospektində yerləşən MotoPro-dur. Bura həm də digər motosikletlərin təmir mərkəzidir. MotoPro-da əsasən, Hindistanın istehsalı olan yeni model "Bajaj" markalı motosikletlər satılır. Motosikleti sürməyi bacarmayan şəxslər üçün burada təlimlər də təşkil olunur.
Yeni motosikletlər satan mağazalardan ikincisi Venesiya şadlıq sarayının yaxınlığında yerləşən "Motobiker" satış mərkəzidir ki, burada motosikletlərlə yanaşı, dəbilqələr, moto geyim və başqa vasitələr də satılır. "Motobiker" mağazasında Çin istehsalı olan "Zongshen" və Hindistanda istehsal edilən İtaliya brendi olan "Benelli" motosikletləri satışa qoyulub.
Yeni modellərin satıldığı mağazalara "Suzuki Azərbaycan"ı da misal çəkmək olar. Burada adından da göründüyü kimi "Suzuki" brendinin motosikletləri və mühərrikinin həcmi 150 kub santimetr olan, Çin istehsalı "Haojue" modelləri alıcılara təqdim edilir.
Bundan başqa, Badamdar avtomobil bazarında yerləşən bir neçə mağaza var ki, onlara "Zontes Baku", "Motomondo" və "Mondial"ı misal çəkmək olar. Sadalanan mağazalar da yeni modell motosikletlərin satışı ilə məşğuldurlar. Hətta "Mondial" mağazasında Azərbaycan istehsalı olan "Tufan" moped və motosikletləri də satılır. "Motomondo" mağazasında isə daha çox mühərrikinin həcmi yuxarı olan motosikletlər var.
Motosiklet alarkən nələrə diqqət etmək lazımdır?
Motosiklet almazdan əvvəl onu hansı məqsədlə sürəcəyinizi dəqiqləşdirmək ən vacib məqamlardan biridir. Belə ki, əgər kuryer fəaliyyəti ilə məşğul olacaqsınızsa, mühərrikinin həcmi az olan moped və motosikletlər tövsiyə olunur ki, bu da benzin sərfiyyatı baxımındandır. Gündəlik sürmək və ya əyləncə məqsədli istifadə edəcəksinizsə, yuxarı kublu motosikletlər uyğun seçim olacaq. Bundan əlavə, motosikletlərin turinq, sport, kruzer, kafe rayser, bobber, skrambler, kros tipləri var ki, bu da alıcının zövqünə, istifadə məqsədinə görə dəyişir. Məsələn, uzun yola çıxmaq üçün turinq tipli motosiklet ideal seçim ola bilər. Sport tipli motosikletlər isə şəhərdaxili, gündəlik sürmək üçün yorucu hesab olunur. Kross tipli motosikletlər isə əsasən, dərə, təpə yollar üçün uyğundur.
Ümumiyyətlə isə, Bakıda aşağı kub, xüsusən də kuryer fəaliyyəti üçün nəzərdə tutulan moped və motosikletlərin satış mərkəzləri olsa da, yuxarı kublu motosiklet həvəskarları üçün ən son modellərin satışı ilə məşğul olan mağazalar yox dərəcəsindədir.
Məsələn, BMW və ya Yamaha brendinin 2020-ci il modelini almaq istəyən şəxsin salona gedib, bu modellərə baxmaq imkanı yoxdur. O, bu motosikletləri ancaq sifarişlə və əlində nağd pulu olduğu halda ölkəyə gətirə bilər ki, bu da fantastik qiymətlərə başa gəlir.
